Nvidia App yangilanishida GPU resurslarini taqsimlash bo‘yicha yangi sozlamalar paydo bo‘ldi

Habr nashriyoti ma’lumotlariga ko‘ra, Nvidia App ilovasining so‘nggi yangilanishida grafik protsessor resurslarini taqsimlash bo‘yicha yangi imkoniyat paydo bo‘ldi. Bu funksiya foydalanuvchilarga faol ishlayotgan dasturlar va fonda ishlaydigan jarayonlar o‘rtasida GPU quvvatini taqsimlash imkonini beradi. Rasmiy e’lon qilinmagan bo‘lsa-da, bu sozlamalar ba’zi foydalanuvchilarda allaqachon mavjud.

Reddit foydalanuvchisi Warkratos Nvidia App 11.0.9.585 versiyasida “GPU App Prioritization” deb nomlangan yangi parametrga e’tibor qaratdi. Ushbu sozlamani “System” bo‘limidagi “Advanced” qismida topish mumkin. Standart holatda resurslar 80/20 nisbatida taqsimlanadi, ya’ni 80% faol dasturlar, 20% esa fonda ishlaydigan jarayonlar uchun ajratiladi.

Foydalanuvchi “Prioritize Foreground” rejimini tanlasa, nisbat 90/10 ga o‘zgaradi. Shuningdek, maxsus sozlamalar orqali bu ko‘rsatkichni 95/5 gacha oshirish mumkin. Bu imkoniyat o‘yinlar paytida fonda ishlaydigan og‘ir jarayonlarning ta’sirini kamaytirishga yordam beradi. Masalan, lokal neyron tarmoqlar yoki GPU yordamida render qilish jarayonlari o‘yin uchun kamroq resurs sarflashiga olib kelishi mumkin.

Funksiyaning ishlashi uchun Nvidia R620 driverlar seriyasi talab qilinadi degan taxminlar mavjud, ammo bu haqida aniq ma’lumot yo‘q. Ba’zi foydalanuvchilar GeForce RTX 5090 kartasida yangilanishdan so‘ng bu sozlamani topganini tasdiqladi. Biroq, boshqa foydalanuvchi RTX 5070 Ti kartasida, 621.12 versiyali driver va Windows 11 tizimida ham bu imkoniyatning yo‘qligini xabar qildi.

Testlar natijalariga ko‘ra, GeForce RTX 4090 kartasida ham, eng so‘nggi WHQL Game Ready 621.01 driver o‘rnatilgan bo‘lsa-da, yangi sozlamalar aniqlanmadi. Bu holat funksiyaning hali to‘liq taqdim etilmaganligini yoki faqat ma’lum qurilmalar uchun sinovdan o‘tkazilayotganligini ko‘rsatadi. Nvidia hali rasmiy izoh bermadi.

Eslatib o‘tamiz, joriy yilning yozida chiqarilgan 11.0.8 versiyasida ShadowPlay orqali 240 FPS tezlikda video yozish imkoniyati qo‘shilgandi. Shuningdek, DLSS Override va ko‘plab o‘yinlar uchun “Optimal Settings” funksiyalari ham shu yangilanishda taqdim etilgan edi.